Mark 4

Yesu Wa Wu Aza Nya

1Nsa dohoi njesun, aza yezhi n Wo aba n ʼlagbe woi wu ɓa nya. Walo Wa sase dna n ʼya Wa daɓo ɓai dna ɓo. 2Wo ɓei zhin Wa wunya Woi si aza anyi ɓesi nu ndu. Wa si ba doho layi:

3“Fye wo! Fwa-yi ho ɓei lo anya bye. Shi wo ɓei she nya-bye n wo fwa, 4Adoho ɓa kaya zhi zokwo, alu ɓaɓe ɓa tnuɓa ɓa gyi. 5– 6Adoho ɓa kaya kpe na gbaku-ku, ba pye pai, ama safyewi nyipyeyi kwa woɓa ɓa ku fyi, ntu ge oɓa gbegye to lo kni lo m. 7Adoho ɓa kaya fyi n Knawuyi, aknawuyi ɓa kuɓa gyi sun to ba fya wye m. 8Ama adoho ɓa kaya fyi n kni manayi, ba ga ampani aku shita n du ʼdo nwo ɓo bye nyi, adoho aku shi-tnanyi, adoho har aku tagyi. 9Nfye na tnubua yi gyilo, fya wo!”

10Nnavun sa n ɓa ɓei cezhi n Wo abara awo-cei-aba yi, n Wo aviyi hoi jesun, ɓa nya Wo “Yiye Ha wuyi oho anyi-ɓesi-si awyega.”

11– 12Wa ciɓa ge, “Ala ga fye fya kpe aɓoho ye tu n Shekwoyi bemi tukwo, n ɓa zhin asiri nu nna za ba nɓa ta kpe Wo yem. She anabi Ishaya cei da, ‘Ko da shike ɓa gyelo, ɓai wo, ɓata kpe awye ga m, n na bai ɓa pmida Shekwoyi, Wa zhin ɓa gafara m.’ ” 13“Ama n fye to kep anyi ɓesisi ɓiyi ye awyega m, fye ɓa kpe ajeye wuna n Miye Ma da nyia? 14Fwayi n Ma dawo ɓo nyi, ezanu n wo lo n Shekwoyi ɓedayi, woi zhin kukari wa bye kwo n za bugba.

15“Zokwo n nyabye ho ɓei kaya zhi nyi, kwo wu gye a-za n ɓa na kuta ɓugbayi fyi. Sa n ɓa wo Shekwoyi ɓeda, Shetan wa ɓe n sayi-sayi yi, wa zhin ɓa ɓa zo kwa mwi. 16Agbakuku kni nya wu gye a-za n ɓa wo Shekwoyi ɓeda na gmadayi, 17ama ngye agebegbe putu nu fyi n kni-yi pya, oɓa gbegye to lo shin n kpayin, koda shike ɓa zhin ɓa bmiya kmisun yi, sa n wahala bwa ɓa, ɓa fyi.

18“Ekni akna-wuyi nya wugye aza n ɓa wo Shekwoyi ɓeda ɓa gwo kwo. 19Ama safyewyi aɓowye-da anyinya, n nyabwa ye yi, n na bye-gyi zanyi yi, n na nya manayi shakpe yi, ɓa ɓe ɓa ku Shekwoyi ɓeda gyi sun n ɓa bugba, har to ɓa zhin ampanyi m.

20“Ama ekni manayi nya, wugye aza bugbanu n ɓa wo Shekwoyi ɓeda ɓa gwo kwo n shince kniyi, ɓa ga ampanyi shita, shitnai, har tagyi, ndu odo n na ɓo bye nɓa bugba nyi.” 21Wa nyaɓa ge, “Sa n za dna fitila na, wo zhin wa ɓe n bue yi wa knu kwo?” Awo! Ata gye buzangna har a zhin ampanyi n ceyi m, A zhin a ya fitila tu n nya nu nkwo ɓa ga buzangna dai-dai a bwa kwo gyiba.

22Oɓo kwo bwishi lo nsayi ye, aɓa kpekwa nyaya n wyihoi. 23Nfye na tnubuayi gyilo, fyewo! 24Fye zhin ɓo fya wo, N fya zhin lonu, fye ɓa gna awyega bwa nɓo Mi gna fye nyi. 25Eza n wo nya yi lo aɓa gawo, eza n wo to cei lon, odo n wo cei lo ma aɓa kwo gwo wo.

26Fye wo anyi ɓe sisi deye, Fya kpe shi Shekwoyi ebemi wu. 27Fwayi ho ɓo bye anya nwo fwa, wa lo wo nya: anya pa har ba mwa n tnawo bamzhin. 28Ntuge ekni nu ɓo zhin nyabye kwa mwa. Kmisun-yi, fyintolo nu ɓo gmi be kpa, n sayi alkama tukwo ɓa ɓe har ɓa ɓi. 29Kwonu o fwada ɓe sagmanyi yi nwo limzhegye yi wa gbe ɓa.

30Yesu wa nyage, “Mi ba wufye shi Shekwoyi bemi wun n wunana? Miba gbekwodo n knihin nu fya bwa awyega?” 31– 32Kwo wu gye mustard byegye nu. Kwo bwa sun ciwyi nu, ama shi kwo mwa, kwo zhin kwa du a shinwa ʼje mwa-mwa n na bwalayi mwakpa har aluyi ɓe ɓai kpa ma n kwa bwala.

33Wa si ɓa anyi ɓesi n mwa shi ɓa ɓa mi ɓa bwa awyega. 34Behin-hin, wo ɓei zhin Woi wu nya, n nanyi ɓe-sisi yi nu du n deji aba, ama sa n Wa pmigni n Wa barayi, Wa wuɓa awyega. 35Sa wyeshe ɓei she, Yesu wa gna Wo abara ge, “Yi piya lo nuwan kma deyi.” 36Ɓa lo ɓa ya aza zhi (kwo da yake aya je ɓei vi ɓa na vun). 37Safyewyi agmasa ci, anuwan dokwo ɓa kuka ɓai ce eya abwa ya, nuwan ye kwa nu eya-har kwoi ye kwa shin. 38Yesu ɓei la wangye dna eya avun tu na gyewan nya. Ɓa knu Wo agyewyi ya ɓai gna, “Male, Ho tagye Ha nuwan lo n yi bwi-bwi ɓo yin?”

39Wa gnakni se, Wa ci ola ge, “La ce pyi” Ese, n na nuwan dokwoyi, ɓa ze cei pyi.

40Wa nya ɓa ge, “Knihin nu ɓo zhin fyei wodna? Har saiye fye to gami Gaiciya n?”

41Ca wo ɓa ɓai gna je ge, “Nyikado pya nu dna n zaye ya, har ese n ʼlayi ɓai wo-wo ɓeda?”